Podcast (കവിത കേൾക്കാൻ )
https://pravasirisala.com/archives/1298
പ്രവാസി രിസാല ആഗസ്ത് ലക്കം 2020
അത്ര നിഷ്കളങ്കമല്ല ഒന്നും
ചില ജീവിവർഗ്ഗങ്ങൾ
അവരല്ലാത്തവരെ
കൂട്ടത്തിൽ കൂട്ടാറില്ല
അവരെപ്പോലെ ആകണമെങ്കിൽ
അവർ ചൂണ്ടിക്കാണിക്കുന്ന
ജീവിത ഫ്രെയ്മിൽ അഭിനയിക്കേണ്ടതുണ്ട്
കഴുതയെ ചായംപൂശി
സീബ്രയാക്കുന്നതു പോലുള്ള
സാഹസമാണത്
സാധാരണമെന്ന് വെച്ചുനീട്ടുന്നതിൽ
കാണുന്നതൊന്നും
അത്ര നിഷ്കളങ്കമല്ല
സംവിധായകന്റ കലാവിരുതുകൾ
ഒളിച്ചിരിക്കാത്ത മുക്കും മൂലയും
അതിലുണ്ടാവില്ല
കേട്ടുകേൾവികളെ
പ്രകൃത്യായെന്നും സാർവ്വത്രികമെന്നും
അധികാരത്തിന്റെ ഉന്തുവണ്ടികൾ
വീട്ടുപടിക്കലെത്തിക്കുമ്പോൾ
എന്റെ മോക്ഷമേയെന്ന്
വാരിപുണരുന്നിടം
തുടങ്ങുന്നു അടിമത്തം !
സത്യാസത്യങ്ങളും
ശുഭാശുഭങ്ങളും
തിരിച്ചറിയാനാകാത്ത
ഇരുൾസ്ഥലികളിലേയ്ക്ക്
അത്ര വേഗത്തിൽ
ആട്ടിത്തെളിക്കാൻ പറ്റിയ
ആട്ടിൻപ്പറ്റമായിരുന്നില്ല നാം!
കളഞ്ഞുപോയ വിളക്ക് തിരയേണ്ടതുണ്ട്...
***************************************
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ
പ്രചോദനത്തിനായി എന്തെങ്കിലും രണ്ടു വാക്ക് പറയണേ...