അച്ഛൻ
നടന്ന വഴികളിലെല്ലാം
മുള്ളുകളായിരുന്നിട്ടു കൂടി
ചെരുപ്പിടാറില്ലായിരുന്നു അച്ഛൻ
വഴി അവസാനിച്ചെന്ന്
തോന്നിയിടത്തു നിന്ന്
പുതുവഴി വെട്ടി മുന്നോട്ടു നടന്നതല്ലാതെ
പിന്തിരിഞ്ഞിട്ടില്ല അച്ഛൻ
ഒലിച്ചിറങ്ങുന്ന വിയർപ്പിനെ
അപ്പമാക്കി മാറ്റുന്ന മാന്ത്രികവിദ്യ
അച്ഛനു വശമുണ്ടായിരുന്നതു കൊണ്ട്
വെയിലും നിലാവും എത്തി നോക്കുന്ന
വീടിന്റെ അകത്തളങ്ങളില്‍ നിന്ന്
നിലവിളികൾ ഉയർന്നില്ല
തോടും പാടവും നിറച്ച്
കുന്തിരിമറിഞ്ഞെത്തിയ മഴയെ
വീട്ടിൽ കേറാൻ
അച്ഛൻ സമ്മതിക്കാത്തത് കൊണ്ട്
തുള്ളികൾ അകത്തേയ്ക്കെറിഞ്ഞു
പരിഭവത്തോടെ മടങ്ങുകയായിരുന്നു
അച്ഛൻ പോയി...
വെയിലും നിലാവും കൂടെപ്പോയി
ഇന്ന്
വയറ്റിൽ അഗ്നിനിയെരിയുന്നില്ല
തൊണ്ടക്കുഴിയിൽ ദാഹം കൂടുകൂട്ടുന്നില്ല
മഴ അവസാനിക്കുന്നില്ല!
അകവും പുറവും നനയ്ക്കുന്ന
നിലയ്ക്കാത്ത മഴ...
------------------------------
കെ ടി എ ഷുക്കൂർ മമ്പാട്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ
പ്രചോദനത്തിനായി എന്തെങ്കിലും രണ്ടു വാക്ക് പറയണേ...