സസ്നേഹം ആഴ്ചപ്പതിപ്പ്

ശ്ലഥബിംബങ്ങൾ

കാലമേ
മറന്നു വെച്ച ഒരു വസ്തുവായി
സമയശൂന്യ സമസ്ഥിതങ്ങളിൽ
എന്നെ ഉപേക്ഷിക്കുക...

സ്ഥലകാലമാനങ്ങളിലെ
മരുപ്പച്ചകൾക്കായുള്ള അലച്ചിലുകൾ
മകുടിയൂതി വരുത്തിയ
കരിമൂർഖ ദംശനങ്ങൾ.
കത്തുന്ന അറിവിന്റെ തീജ്വാലകളിൽ
ബോധമണ്ഡലം വേവുന്ന      
തകർന്ന ദേശത്തിന്റെ
ശ്ലഥബിംബസ്മാരകം  ഞാൻ

ശരത്കാല മരങ്ങളിൽ
വിറകൊള്ളുന്ന  ഇലകൾ
അസ്തിത്വഭാരമിറക്കാൻ
നിശൂന്യസ്ഥലികളെ
ആവാഹിക്കുകയാണ്

പാൽനിലാവ് കുടിച്ചു വറ്റിച്ചു
പകൽ  ഉറഞ്ഞു തുള്ളുമ്പോൾ
വന്ധ്യ മേഘങ്ങളിൽ നിന്ന്
മരണം പെയ്യുമ്പോൾ
രാത്രിക്കൂട്ടിലടച്ചു
വെളിച്ചത്തെ കൊല്ലാൻ
അവൻ വരും ....

വാക്കുകൾ

ചില വാക്കുകളുണ്ട്
നാക്കുകളിൽ കിടന്നു ചീഞ്ഞ്
പേരും പൊരുളും നഷ്ടപ്പെട്ടു
പേപ്പട്ടികളെപ്പോലെ
തെരുവിൽ അലയുന്നവ

ചില വാക്കുകളുണ്ട്
മൗനങ്ങളുടെ വിശുദ്ധഭാഷണം
കട്ടുകേൾക്കാൻ വരുന്നവ .
വാക്കുകൾ വ്യഭിചരിക്കുന്നിടത്ത്
മൗനങ്ങൾ കേറി വരാറില്ല

ചില വാക്കുകളുണ്ട്
നിഷ്കളങ്കമായവ
ആകാരംകൊണ്ട് സുന്ദരമല്ലാത്തവ
ദോഷൈകദൃക്കുകളുടെ കണ്ണിൽ
കുറ്റപത്രം ചാർത്തി വെക്കപ്പെട്ടവ

ചില വാക്കുകളുണ്ട്
നേർത്ത മഞ്ഞു പോലെ..
മൗനത്തിൽ നിന്ന് വേർപ്പെടുത്താനാവാത്തവ
മൗനങ്ങളെ അനശ്വരമാക്കാനായി മാത്രം
പിറവി കൊണ്ടവ

ചില വാക്കുകളുണ്ട്
പൊരുൾ നഷ്ടപ്പെടാതെ
പൊരുതി മുന്നേറുന്നവ...

ഗാനം

ചില സൗഹൃദങ്ങൾ

ഒരു വൃക്ഷത്തിന്റെ ഗദ്ഗദങ്ങൾ

ദൃശ്യം